د انګلیسي ژبې زده کړه کی عامې تېروتنې

په ډېرو کارونو کې غوره ده چې د نورو خلکو تېروتنو ته پام وکړو او له هغوی زده کړه وکړو، ځکه تېروتنه د پرمختګ یوه برخه ده. کله چې د نورو تېروتنې وینو، باید هڅه وکړو خپله یې تکرار نه کړو. په دې مقاله کې هغه مهمې تېروتنې څېړل کېږي چې باید ونه شي، نه یوازې د انګلیسي ژبې په زده کړه کې، بلکې د هرې ژبې په زده کړه کې.

۱. د کورس ناسم انتخاب او په انتخاب کې سستي کول (او د هغوی په میتود پرمخ تلل)

یو له لویو ستونزو څخه چې ډېری خلک یې کوي، دا ده چې د کورس په انتخاب کې سستي کوي. معمولاً خلک هغه کورسونه غوره کوي چې یا نږدې وي، یا یو ملګری او خپلوان یې ورته ځي، پرته له دې چې پام وکړي چې ایا دا کورس د دوی لپاره مناسب دی که نه. کله کله یوازې د نورو د هڅونې له مخې کورس ټاکي، نه د دې لپاره چې په رښتیا د انګلیسي زده کړه پکې ښه وي.

که موږ یوازې وکولای شو د دې یوې تېروتنې مخه ونیسو او یو ښه کورس انتخاب کړو او په هغه کې د انګلیسي زده کړه پرمخ یوسو، نو له ډېرو نورو ستونزو به وژغورل شو. د دې لپاره غوره ده چې د کورس په اړه له بېلابېلو لارو څېړنه وکړو: د تدریس طریقه او میتود یې وپېژنو، د پخوانیو زده کوونکو پایلې وګورو، او دا معلومه کړو چې په څومره وخت کې زده کوونکي انګلیسي زده کوي. ټولې ښې او بدې خواوې یې وارزوو او بیا د خپلو شرایطو له مخې پرېکړه وکړو.

۲. د تمرین ارزښت نه پېژندل او ژر زړه‌توري کېدل

یو له لویو تېروتنو څخه دا ده چې کله خلک تمرین کوي او تېروتنه وکړي، نو د دوام ورکولو پر ځای کار پرېږدي. دوی له دې وېرېږي چې ګواکې بریالي نه شي، یا خپلو ټاکل شویو هدفونو ته ونه رسېږي. زموږ دماغ د دوامداره تمرین ارزښت نه پېژني، نو ژر غواړي کار پرېږدي. د دې لپاره زه تاسو ته د «عصبي لاره» مقاله سپارښتنه کوم، څو پوه شئ چې د مهارتونو په زده کړه کې زموږ په دماغ کې څه پېښېږي.

۳. د نه‌امکانه هدف ټاکل

ځینې خلک چې تر اوسه یې لوی کار نه وي کړی، ناڅاپه ځان ته ډېر غټ هدف ټاکي او غواړي ژر یې ترسره کړي. مثلاً څوک چې د کتاب لوستلو عادت نه لري، ناڅاپه پرېکړه کوي چې یو کتاب په یوه ورځ کې ختم کړي. پایله یې دا وي چې ژر زړه‌توری کېږي او کتاب نیمګړی پرېږدي. په انګلیسي زده کړه کې هم همداسې ده: ډېر خلک غواړي په څو میاشتو کې د خپلې مورني ژبې په شان انګلیسي خبرې وکړي، چې د ډېرو لپاره ناشوني دي.

<h2><strong>۴. د خبرو تمرین نه کول

موږ ټول پوهېږو چې د ژبې په زده کړه کې د خبرو کولو مهارت تر ټولو مهم مهارتونو څخه دی. ډېری کسان چې غواړي انګلیسي زده کړي، اصلي هیله یې دا وي چې وکولای شي په روانه توګه خبرې وکړي. خو د دې لپاره چې دا مهارت پیاوړی شي، یوازې د لغتونو او ګرامر زده کول بسنه نه کوي باید په عمل کې یې وکاروو.

کله چې موږ په انګلیسي خبرې کوو، هغه لغاتونه او ګرامري جوړښتونه چې زده کړي مو دي، په حافظه کې ټینګېږي او ورو ورو زموږ د اوږدمهاله حافظې برخه ګرځي. د دې لپاره کولای شو له بېلابېلو سرچینو ګټه واخلو، لکه د آیلتس د سپیکنګ پوښتنو تمرین، یا د انټرنېټ څخه د موضوعاتو موندل او د هغو په اړه خبرې کول.

په یاد ولرئ: زموږ دماغ یوازې هغه څه په یاد ساتي چې تکرار او تمرین یې وشي. نو هر څومره چې خبرې وکړئ، هماغومره به مو مهارت پیاوړی شي.

۵. د اورېدلو (لسنینګ) ستونزه او د حل لارې

د ډېرو زده کوونکو لپاره د اورېدلو مهارت تر ټولو ستونزمن مهارت دی. ډېری کسان له دې مهارت څخه ژر زړه‌توري کېږي، ځکه چې د خبرو د درک کولو پر مهال له ستونزو سره مخ کېږي. خو باید پوه شو چې لسنینګ یوازې د صنف تمرین نه دی، بلکې پراخه ساحه لري.

موږ باید وکولای شو د انګلیسي ژبې خبرې، خبرونه، فلمونه، ډرامې او حتی د خلکو ورځنۍ خبرې په ښه توګه درک کړو. د دې لپاره یوازې د کتابي تمرینونو بسنه نه کوي، بلکې باید ځان د ژبې په چاپېریال کې واچوو.

زه د همدې ستونزې د حل لپاره یو کوچنی کتاب لیکلی دی چې پکې د اورېدلو د مهارت د پیاوړتیا لپاره عملي تخنیکونه وړاندې شوي دي. که غواړئ په دې برخه کې پرمختګ وکړئ، دا کتاب به درسره مرسته وکړي چې د اورېدلو مهارت مو په لوړه کچه ورسوي.

۶. د ګرامر په زده کړه کې تېروتنه

ډېری زده کوونکي ګرامر یوازې د حفظ لپاره زده کوي، لکه د فورمولونو یادول، پرته له دې چې په خبرو کې یې وکاروي. دا طریقه د ژبې د زده کړې لپاره اغېزمنه نه ده.

ګرامر باید د خبرو کولو لپاره زده شي، نه د حفظ لپاره. کله چې نوی ګرامري جوړښت زده کوو، باید پوه شو چې څنګه یې په جملو کې وکاروو، او بیا یې په خبرو کې عملي کړو. یوازې د ګرامر کتاب لوستل بسنه نه کوي اصلي پرمختګ هغه وخت راځي چې ګرامر په واقعي خبرو کې وکارول شي.

۷. یوازې د صنف زده کړې ته بسنه کول

یوه بله عامه تېروتنه د انګلیسي ژبې زده کړه دا ده چې زده کوونکي یوازې په کورس کې ورکړل شوې زده کړې ته بسنه کوي او له کورس بهر هېڅ تمرین نه کوي. دا کار د پرمختګ سرعت ډېر ورو کوي.

که غواړئ په انګلیسي کې چټک پرمختګ وکړئ، باید له کورس بهر هم د ژبې سره اړیکه وساتئ کتابونه ولولئ، فلمونه او ویډیوګانې وګورئ، د انټرنېټ له سرچینو ګټه واخلئ، او حتی له ملګرو سره په انګلیسي خبرې وکړئ.

یاد ولرئ: د ژبې زده کړه یوازې د صنف د څو ساعتونو کار نه دی، بلکې یوه ورځنۍ عادت جوړول غواړي.

۸. فکر نه کول په انګلیسي کې

یو له هغو عامو ستونزو څخه چې ډېری زده کوونکي ورسره مخ کېږي دا ده چې کله غواړي په انګلیسي خبرې وکړي، لومړی جمله په خپل ذهن کې په خپله مورني ژبه جوړوي او بیا یې ژباړي. دا کار د خبرو کولو بهیر ورو کوي او طبیعي نه ښکاري. دا حالت داسې دی لکه چې څوک غواړي مڼه وخوري، خو لاس له سر شاوخوا تاو کړي او بیا یې خولې ته ورسوي یوه اوږده او بې‌ځایه لاره.

کله چې موږ د جملو جوړولو لپاره تل له ژباړې کار اخلو، زموږ د خبرو کولو رواني او سرعت کمېږي. د دې ستونزې د حل لپاره باید هڅه وکړو چې کله په انګلیسي خبرې کوو، په خپله مورني ژبه فکر ونه کړو. که څه هم په پیل کې د ژباړې اړتیا طبیعي ده، خو که دا عادت دوام وکړي، پرمختګ مو ورو کوي.

یوه اغېزمنه لاره دا ده چې هر څومره کولی شو په انګلیسي خبرې وکړو، حتی که تېروتنې هم وکړو. هڅه وکړئ داسې وانګېرئ چې یوازینۍ ژبه چې تاسو پرې پوهېږئ، همدا انګلیسي ده. د ورځنیو خبرو تمرین، د موضوعاتو په اړه فکر کول او د جملو جوړول په انګلیسي کې، به ورو ورو دا عادت در کې جوړ کړي چې مستقیم په انګلیسي فکر وکړئ او خبرې وکړئ.

۹. د لهجې (اکسنت) په برخه کې بې‌پامي

دا چی موږ په لومړی کی د لهجه په برخه کی په انګلیسی ژبه کی کار ونکړو نو په داسی وخت کی دا د دی لامل کیږی چی وروسته په سختی سره دا عادت مو چوړ کړو. د همدی لپاره د انګلیسي ژبې زده کړه لومړیو کی ددی عادت په جوړولو ځان بوخت کړو.

۱۰. مهم لغاتونه نه زده کول

په انګلیسي ژبه کې زرګونه، بلکې سلګونه زره لغاتونه شته. د ټولو لغاتو زده کول نه یوازې ناشوني دي، بلکې وخت هم ضایع کوي. د دې پر ځای، باید لومړی هغه لغاتونه زده کړو چې ډېر کارېدونکي دي او په ورځني ژوند، خبرو او لیکلو کې ډېر راځي.

د بېلګې په توګه، د انګلیسي ۱۰۰۰ تر ټولو مهم لغاتونه د زده کړې لپاره غوره پیل دی. دا لغاتونه د ژبې د بنسټ ډبرې دي او که تاسو یې زده کړئ، کولای شئ د ډېرو ورځنیو حالاتو لپاره خبرې وکړئ او متنونه ولولئ. وروسته له دې چې دا مهم لغاتونه مو زده کړل، کولای شئ ورو ورو خپل لغت‌ذخیره پراخه کړئ او د ځانګړو موضوعاتو لغاتونه هم ورزیات کړئ.

۱۱. تشویش د دې په اړه چې ژبه ونه شم زده کولی

د هرې ژبې زده کړه په پیل کې زموږ لپاره ستونزمنه وي. له همدې امله کېدای شي په لاره کې کله ناکله نا هیلي شو او خپله انګېزه له لاسه ورکړو. خو د دې تر څنګ، د بریا تر ټولو مهم راز یوازې دوام ورکول او هڅه کول دي، ځکه چې دا کار حتمي موږ پایلې ته رسوي.